Ligji ia ndalon Kryeministrit Kurti të përzihet në sindikata

Kryeministri i Kosovës, Albin Kurti, përmes deklaratave të tij, po shkel Ligjin nr. 04/L-11 për organizimin sindikal në Kosovë.

Ky ligj, ia ndalon autoriteteve qeveritare të ndërhyjnë në organizimin sindikal dhe në zgjedhjen e përfaqësuesve sindikal.

Por, Kryeministri Kurti ka shprehur pikërisht dëshirën e tij që të ndërrohen disa drejtues sindikatash.

“Uroj që ndryshime të ketë gjithandej, siç po bëhen ndryshimet në politikë, duhet të ketë ndryshime edhe në çdo sferë të jetës shoqërore dhe profesionale”, tha Kurti, kur u pyet lidhur me grevat që janë duke u organizuar nga sindikatat e shëndetësisë, dhe të tjerat që paralajmërojnë të tilla nëse nuk hyn në fuqi Ligji i Pagave.

Por kjo deklaratë fare nuk ju ka pëlqyer krerëve të sindikatave të shëndetësisë dhe atyre të arsimit, ku i kanë çuar mesazh kryeministrit Kurti që të mos ndërhyjë në këtë, pasi nuk është punë e tij se kush i drejton sindikatat.

Blerim Syla, kryetar i Federatës së Shëndetësisë së Kosovës, ka qenë tejet i ashpër në reagimin e tij, ku ka deklaruar se Kurti e ka tepruar me kërcënime.

“Shoku Kurti sikur e ke tepru me kërcënime dhe shantazhe ndaj emrit Dr. B. Syla, por po ju rikujtoj: “KOHA E DIKTATORËVE KA KALUAR dhe çdo tendencë e jotja do të dështoj. Liderët sindikal zgjidhen nga punëtorët shëndetësorë e jo nga politika”, ka shkruar Syla në Facebook.

Ai ka shkuar më tej ku pohon se Qeveria Kurti ka shkel ligjin anti-COVID me zbritjen e shtesave, dhe akuzon se i ka vjedhur ato për dy muaj

“Albin Kurti shihemi në greva të ligjshme apo jo, e vendos punëtori, ndërsa t’i dhe qeveria jote e keni shkel ligjin anti-covid duke i zbritur shtesat nga 300€ ne 60€, e qe besa dhe duke i vjedhur ato për 2 muaj”, ka shkruar Syla.

Kurse, Rrahman Jashari nga Sindikata e Bashkuara e Arsimit, Shkencës dhe Kulturës (SBASHK), ka thënë se kjo është hera e parë që nga paslufta që një kryeministër i vendit e thotë një deklaratë të tillë.

“Është hera e parë që nga paslufta që një qeveri e jep një deklaratë të tillë. Për atë se kush e udhëheq një sindikatë nuk e vendos Qeveria dhe asnjë ministri, vendos vetëm anëtarësia e atij sektori,” ka thënë Jashari për mediat.

Ai thotë se janë delegatët ata që vendosin se kush e udhëheq SBASHK-un.
“Në SBASHK në çdo katër vjetët mbahet kongresi, delegatët vendosin se kë do ta zgjedhin për t’i drejtuar,” ka thënë Jashari.